March 3, 2021

Live Breaking News Coverage & Updates Website IN Gujarati Language

Live Breaking News Coverage & Updates Website IN Gujarati Language

કચ્છ: મુંદ્રા કસ્ટોડીયલ ડેથ કેસમાં PI સહિત બેની ધરપકડ

Share This :

ભુજ: કચ્છ જિલ્લાના મુંદ્રામાં પોલીસ કસ્ટડીમાં ચોરીના કેસના શંકાસ્પદ વ્યક્તિના મોતના કેસમાં સસ્પેન્ડેડ પોલીસ ઈન્સ્પેક્ટર અને અન્ય એક શખસની ધરપકડ કરવામાં આવી છે. આ કેસમાં અગાઉ આ પોલીસ ઈન્સ્પેક્ટર અને ત્રણ કોન્સ્ટેબલને સસ્પેન્ડ કરાયા હતા. આ કેસમાં સસ્પેન્ડ કરાયેલા ત્રણ કોન્સ્ટેબલ હજુ ફરાર છે.

ઘટનાની વિગત મુજબ, મુંદ્રા પોલીસે ગત 12 જાન્યુઆરીએ મુંદ્રા તાલુકાના સમાઘોઘા ગામના 30 વર્ષના અરજણ ગઢવી નામના યુવાનને તેના જ ગામમાં થયેલી ચોરીના કેસમાં સંડોવણી હોવાની શંકાના આધારે પકડ્યો હતો. ગત 19મી જાન્યુઆરીએ તેનું સરકારી હોસ્પિટલમાં સારવાર દરમિયાન મોત નીપજ્યું હતું. મૃતક યુવાનના પરિવારજનોનો આરોપ છે કે, મુંદ્રા પોલીસ સ્ટેશનના ત્રણ કોન્સ્ટેબલોએ અરજણને 6 દિવસ સુધી ગેરકાયદે કસ્ટડીમાં ગોંધી રાખ્યો હતો. બાદમાં 19મી જાન્યુઆરીએ તેનું સરકારી હોસ્પિટલમાં સારવાર દરમિયાન મોત થયું હતું. પરિવારનો આરોપ છે કે, અરજણ પર કસ્ટડીમાં થયેલા અત્યાચારને કારણે તેનું મોત નીપજ્યું છે. આ મામલે 21મી જાન્યુઆરીએ અરજણના કૌટુંબિક ભાઈએ ત્રણેય કોન્સ્ટેબલો સામે ફરિયાદ નોંધાવી હતી. ફરિયાદમાં આરોપ મૂકાયો છે કે, અરજણને પોલીસ કસ્ટડીમાં થર્ડ ડિગ્રી અપાઈ હતી અને તેને ઈલેક્ટ્રિક શોક પણ અપાયો હતો, જેના કારણે તેનું મોત નીપજ્યું છે.

આ મામલે કચ્છ-પશ્ચિમના એસપી સૌરભસિંહે ગત રવિવારે જણાવ્યું હતું કે, હત્યાના આરોપનો કેસ નોંધાવાને પગલે પીઆઈ જે એ પઢિયાર અને ત્રણેય કોન્સ્ટેબલ- શક્તિસિંહ ગોહિલ, અશોક કન્નડ અને જયદેવસિંહ ઝાલાને સસ્પેન્ડ કરી દેવાયા છે. ઉલ્લેખનીય છે કે, આ સસ્પેન્ડેડ કોન્સ્ટેબલો સાથે દારુની મહેફિલ માણતા અન્ય બે કોન્સ્ટેબલોની તસવીર વાયરલ થયા બાદ તેમને પણ સસ્પેન્ડ કરી દેવાયા છે.

હવે, આ મામલે સસ્પેન્ડેડ પીઆઈ જે એ પઢિયાર અને અન્ય એક શખસની ધરપકડ કરવામાં આવી છે. જ્યારે આ કેસમાં સામેલ ત્રણ કોન્સ્ટેબલોને શોધવા પોલીસે તજવીજ હાથ ધરી છે.

ઉલ્લેખનીય છે કે, ગઢવી યુવાનના પોલીસ કસ્ટડીમાં શંકાસ્પદ મોતથી ચારણ સમાજમાં ભારે આક્રોશ ફેલાયો હતો. મૃતકના પરિવારજનો અને સમાજના આગેવાનોએ ત્રણેય કોન્સ્ટેબલની ધરપકડ ન થાય ત્યાં સુધી લાશ ન સ્વીકારવાની વાત કરતા હલચલ મચી ગઈ હતી. બાદમાં ઉચ્ચ અધિકારીઓ અને રાજકીય આગેવાનોની સમજાવટથી મામલો શાંત પડાયો હતો.

Share This :