April 11, 2021

Live Breaking News Coverage & Updates Website IN Gujarati Language

Live Breaking News Coverage & Updates Website IN Gujarati Language

કોરોનાની અસર: ગુજરાતના પ્રખ્યાત મંદિરોમાં દાનની રકમમાં થયો ઘટાડો

Share This :

હાઈલાઈટ્સ:

  • કોરોનાને કારણે શ્રદ્ધાળુઓની મુલાકાત ઓછી થઈ.
  • ગુજરાતના ચાર મુખ્ય મંદિરોમાં 37 ટકાનો ઘટાડો.
  • રાષ્ટ્રવ્યાપી લોકડાઉનની પણ અસર જોવા મળી.

ભરત યાજ્ઞિક, અમદાવાદ- કોરોના મહામારીને કારણે ગુજરાતના મંદિરોમાં શ્રદ્ધાળુઓની મુલાકાતમાં ઘટાડો જોવા મળ્યો છે, સાથે જ દાનની રકમ પણ પ્રભાવિત થઈ છે. રાજ્યના ચાર મુખ્ય મંદિરોની વાત કરીએ તો, પાછલા વર્ષની સરખામણીમાં 2020-21માં 37 ટકાનો ઘટાડો નોંધાયો છે. આ ચાર મંદિરો વેરાવળમાં આવેલ સોમનાથ મંદિર, દ્વારકામાં આવેલ દ્વારકાધીશ મંદિર, બનાસકાંઠાનું અંબાજી મંદિર તેમજ ડાકોરના રણછોડ મંદિરનો સમાવેશ થાય છે.

જો વ્યક્તિગત આંકની વાત કરવામાં આવે તો દાનની રકમમાં 20થી 55 ટકાનો ઘટાડો જોવા મળ્યો છે. 2019-2020માં આ ચાર મંદિરોમાં 119.35 કરોડ રુપિયા દાનની રમક એકઠી થઈ હતી, જે ઘટીને 74.91 કરોડ થઈ છે. સૌથી વધારે ઘટાડો સોમનાથ મંદિરમાં જોવા મળ્યો છે. 2019-2020માં આ રકમ 44 કરોડ રુપિયા હતી, જે ઘટીને 20.24 કરોડ રુપિયા થઈ છે. શ્રી સોમનાથ મંદિર ટ્રસ્ટના સેક્રેટરી પી.કે.લહેરી જણાવે છે કે, કોવિડ પરિસ્થિતિને કારણે દાનમાં 50 ટકાનો ઘટાડો નોંધાયો છે. રાષ્ટ્રવ્યાપી લોકડાઉનને કારણે મંદિર લાંબા સમય સુધી બંધ હતું જેના કારણે દાનની રકમ પ્રભાવિત થઈ છે.

અંબાજી મંદિરની વાત કરીએ તો અન્ય મંદિરોની સરખામણીમાં અહીં દાનની રકમમાં ધરખમ ઘટાડો જોવા નથી મળ્યો. 2019-20માં આ રકમ 51.63 કરોડ રુપિયા હતી, જે ઘટીને 41.34 કરોડ થઈ છે. શ્રી આરાસુરી અંબાજી માતા દેવસ્થાન ટ્રસ્ટના ડેપ્યુટી કલેક્ટર અને સંચાલક એસ.જે.ચાવડા જણાવે છે કે, પ્રતિ અઠવાડિયાના 30-35 લાખની સરખામણીમાં દાનની રકમ ઘટીને 15-18 લાખ થઈ છે. ત્રણ અઠવાડિયા પહેલા આ ઘટાડો જોવા મળ્યો છે. ઘણાં શ્રદ્ધાળુઓ મુલાકાત લેવાનું ટાળતા હોવાને કારણે ઓનલાઈન ડોનેશન મોકલવામાં આવે છે.

ડાકોર મંદિરના મેનેજર રવિન્દ્ર ઉપાધ્યાય જણાવે છે કે, મુલાકાતીઓની સંખ્યામાં 60 ટકાનો ઘટાડો જોવા મળ્યો છે. કોરોનાના વધતા વ્યાપને ધ્યાનમાં રાખીને હોળી દરમિયાન મંદિર બંધ રાખવામાં આવ્યુ હતું. સામાન્યપણે આ સમયગાળામાં 3 લાખ જેટલા શ્રદ્ધાળુઓ આવતા હોય છે. અન્ય મંદિરોની જેમ જ દ્વારકાધીશ મંદિર જૂન મહિનામાં ખોલવામાં આવ્યુ હતું. પાછલા વર્ષની સરખામણીમાં 5 કરોડનો ઘટાડો જોવા મળ્યો છે. મંદિરના ટ્રસ્ટના એક સૂત્રના જણાવ્યા અનુસાર, ગયા વર્ષે મંદિરના દ્વાર ખોલવામાં આવ્યા ત્યારે દરરોજ 3000 શ્રદ્ધાળુઓ આવતા હતા. થોડા સમય પહેલા આ આંકડો વધીને 7000 સુધી પહોંચ્યો હતો.

Share This :