April 11, 2021

Live Breaking News Coverage & Updates Website IN Gujarati Language

Live Breaking News Coverage & Updates Website IN Gujarati Language

બેફામ કોરોનાઃ SVPમાં બેડ વધારાશે અને સમરસ હોસ્ટેલમાં કોવિડ સેન્ટર ફરી શરું કરાશે

Share This :

હાઈલાઈટ્સ:

  • છેલ્લા 6 દિવસમાં 4115 જેટલા કેસ નોંધાતા કોરોનાના કહેરનો અંદાજ આવી શકે છે.
  • 1200 બેડ સિવિલના 1 હજાર બેડ અને 100 ખાનગી હોસ્પિટલના 3945માંથી 3201 બેડ ભરાઈ ગયા
  • હોસ્પિટલોમાં બેડ વધારવા અને નવા કોવિડ સેન્ટર ઉભા કરવા ફરજ પડી

અમદાવાદઃ અમદાવાદમાં છેલ્લા 24 કલાકમાં કોરોનાના નવા 798 કેસ નોંધાયા છે. 10 દિવસથી રોજે રોજ કેસની સંખ્યા 600 ઉપર અને છેલ્લા બે દિવસથી 700થી વધુ આવી રહી છે. શહેરમાં 17 માર્ચ 2020ના રોજ કોરોનાનો પહેલો કેસ નોંધાયા પછી કેસનો આંક 4 હજાર સુધી પહોંચવામાં 45 દિવસ લાગ્યા હતા. પરંતુ છેલ્લા 4 હજાર કેસ એપ્રિલના 6 દિવસમાં જ આ‌વી ગયા છે. 1થી 6 એપ્રિલ સુધીમાં 4115 કેસ નોંધાયા છે. હજુ પણ કેસનો આંકડો વધી શકે છે. છેલ્લા 24 કલાકમાં કોરોનાથી વધુ 7 દર્દીના મૃત્યુ પણ થયા હતા.

સોલા સિવિલમાં 50 લોકો ઓક્સિજન પર

માર્ચથી જ કેસમાં વધારાની શરૂઆત થઈ જવા સાથે પરિસ્થિતિ ગંભીર બની છે. કોરોનાની સારવાર કરતી શહેરની 100 ખાનગી હોસ્પિટલના 3945માંથી હવે માત્ર 744 બેડ ખાલી છે. જ્યારે 4 કોવિડ સેન્ટરના 239 બેડમાંથી 80 દાખલ છે. સિવિલ હોસ્પિટલના એડિશનલ સુપરિન્ટેન્ડેન્ટ ડો. રાકેશ જોશીના જણાવ્યા અનુસાર, 1200 બેડની સિવિલ હોસ્પિટલમાં પણ 1 હજાર બેડ ભરાઈ ગયા છે. સોલા સિવિલમાં પણ 450 બેડમાંથી 169 બેડ પર દર્દી દાખલ છે. જેમાંથી 50 ઓક્સિજન પર છે.

એરપોર્ટ પર 1 એપ્રિલ સુધીમાં 10 પેસેન્જર પોઝિટિવ

ડોમેસ્ટિક અને ઈન્ટરનેશનલ ટર્મિનલના એરાઈવલ એરિયામાં 1 એપ્રિલથી અત્યાર સુધી કરવામાં આવેલા 2056 આરટીપીસીઆર ટેસ્ટમાંથી 10 પેસેન્જર પોઝિટિવ આવ્યા છે. આમાંથી કેટલાકને હોસ્પિટલમાં ખસેડાયા છે.

ખાનગી હોસ્પિટલોમાં મ્યુનિ. ક્વોટા અંગે કોઈ નિર્ણય નહીં

એસવીપી હોસ્પિટલને સંપૂર્ણ કોવિડ હોસ્પિટલમાં ફેરવવાના મામલે મ્યુનિ.એ સ્પષ્ટતા કરી છે કે, હાલ અહીં 500 બેડ છે, જે પૂરતાં પ્રમાણમાં છે. જો જરૂર પડશે તો એસવીપી હોસ્પિટલને સંપૂર્ણપણે કોવિડ હોસ્પિટલમાં ફેરવી શકાય છે. ખાનગી હોસ્પિટલોમાં મ્યુનિ.નો ક્વોટા ફરી શરૂ કરવા અંગે અધિકારીઓએ કોઈ સ્પષ્ટતા કરી નથી.

સમરસ હોસ્ટેલ ફરી કોવિડ કેર સેન્ટર બનશે

શહેરમાં કોવિડ કેર સેન્ટર તરીકે બંધ કરેલી સમરસ હોસ્ટેલને ફરીથી કોવિડ કેર સેન્ટર તરીકે શરૂ કરવાની મ્યુનિ.ની તૈયારી છે. અહીં 250થી વધુ બેડની વ્યવસ્થા થશે. સમરસ હોસ્ટેલ ખાતે અગાઉ 1 હજાર કોરોના પોઝિટિવને રાખવાની વ્યવસ્થા ગોઠવવામાં આવી હતી. જોકે બાદમાં કેસો ઓછા થતાં હોસ્ટેલ બંધ કરવામાં આવી હતી.

સુરતમાં પણ ગંભીર સ્થિતિ

શહેરની 43 ખાનગી હોસ્પિટલને કોરોનાની સારવાર માટે ડેઝિગ્નેટેડ કરવામાં આવી છે. આ ખાનગી હોસ્પિટલમાં 2079 બેડ પૈકી 1885 બેડ ફુલ થઇ ગયા છે. સ્મીમેર હોસ્પિટલમાં 650 બેડ પૈકી 464 બેડ ભરાયા છે જ્યારે નવી સિવિલ હોસ્પિટલમાં 2225 બેડ પૈકી 564 બેડ ભરાયા છે. હાલના સંજોગોમાં ખાનગી હોસ્પિટલમાં ફક્ત 200 બેડ ખાલી છે. નવી સિવિલમાં ખાલી બેડની સંખ્યા વધારે છે, પરંતુ દર્દીઓ નાછૂટકે નવી સિવિલમાં દાખલ થઇ રહ્યા છે. પાલિકાએ ખાનગી અને સરકારી હોસ્પિટલમાં બેડની સંખ્યા અને વેન્ટિલેટર વધારવા કવાયત હાથ ધરી છે. શહેરની અનેક મોટી હોસ્પિટલને કોવિડના બેડ વધારવા પાલિકાએ સૂચના આપી છે. નવ ખાનગી હોટલોને કોવિડ કેરમાં ફેરવવામાં આવી છે.

હોટેલના 645 રુમ કોવિડ કેર સેન્ટરમાં ફેરવાયા

ગઇકાલે (સોમવારે) નવ હોટલ બાદ આજરોજ વધુ પાંચ હોટલને કોવિડ કેર સેન્ટરમાં ફેરવવામાં આવી છે. ડુમસ રોડ પર હોટલ ગોકુલધામ, ગોવર્ધન હવેલી સામે હોટલ શ્રીજી વાટિકા, પીપલોદમાં હોટલ ગાંગાણી હાઉસ, સ્ટેશન પર હોટલ જીંજર અને સ્ટેશન પર હોટલ સેન્ટ્રલ બિકોનને કોવિડ કેર સેન્ટર તરીકે જાહેર કરવામાં આવી છે. શહેરની આ 14 હોટલમાં 645 રૂમ કોવિડના દર્દી માટે રિઝર્વ રાખવામાં આવ્યા છે. આ તમામ રૂમ કોવિડ કેર સેન્ટર તરીકે કાર્યરત રહેશે.

કોમ્યુનિટી હોલમાં પણ કોવિડ કેર સેન્ટર

હોસ્પિટલ ફુલ થતા પાલિકાએ કોમ્યુનિટી હોલને કોવિડ કેર સેન્ટરમાં ફેરવવાનો નિર્ણય કર્યો છે. અલથાણ કોમ્યુનિટી હોલ ઓક્સિજન સુવિધા ધરાવતા બેડ સાથે સજ્જ કરવામાં આવશે. પાલ કોમ્યુનિટી હોલ પણ કોવિડ કેરમાં ફેરવાશે. દરેક ઝોનમાં કોમ્યુનિટી હોલને કોવિડ કેરમાં ફેરવી સુવિધા ઊભી કરવામાં આવશે.

અમદાવાદ શહેરમાં નીચેના 22 વિસ્તારો માઇક્રો કન્ટેન્મેન્ટ

  • ગોકુલ રેસિડન્સી,વટવ
  • પ્રથમ લક્ઝૂરિયા,લાંભા
  • આઇએલએફએસ,પીપળજ
  • ગાલા ગાર્ડનિયા,સાઉથ બોપલ
  • ગ્રીન એકર્સ,પ્રહલાદનગર
  • સત્યદિપ હાઇટ્સ,જોધપુર
  • શ્રીનંદનગર-2,વેજલપુર
  • સ્વયંમ શક્તિ ફ્લેટ,વેજલપુર
  • આનંદ મંગલ ફ્લેટ,વેજલપુર
  • સૌભાગ્ય એપાર્ટમેન્ટ,થલતેજ
  • દેવ કુટિર-3,થલતેજ
  • પ્લેઝર વિલા-2,થલતેજ
  • વેનેટિઅન વિલા,થલતેજ
  • જય અદિતિ પાર્ક,ચાંદલોડિયા
  • સારથી રેસિડેન્સી,વસ્ત્રાલ
  • વિક્ટોરિયા એવન્યુ,નિકોલ
  • સ્વપ્નિલ રેસિડેન્સી,નિકોલ
  • ઉદ્ધવ નગર,જૂનાવાડજ
  • સૂર્યલોક ટાવર,જૂનાવાડજ
  • શ્વેતલ સોસા,ગુલબાઇ ટેકરા
  • આશ્રય-10,રાણીપ
Share This :