April 11, 2021

Live Breaking News Coverage & Updates Website IN Gujarati Language

Live Breaking News Coverage & Updates Website IN Gujarati Language

રાત્રિ કર્ફ્યૂની અસરઃ અમદાવાદની મોટાભાગની રેસ્ટોરાંએ સાંજે ડાઈન-ઈન સુવિધા બંધ કરી

Share This :

હાઈલાઈટ્સ:

  • રાત્રિ કર્ફ્યૂના કારણે રેસ્ટોરાં બિઝનેસને પડ્યો ફટકો
  • ઓપરેટિંગ ખર્ચ પોષાતો ન હોવાથી મોટાભાગની રેસ્ટોરાંએ સાંજે ડાઈન-ઈન સુવિધા બંધ કરી
  • દોઢ કલાક અથવા 45 મિનિટ માટે રેસ્ટોરાં ચલાવવાના બદલે ટેકઅવે ઓર્ડર લઈ રહ્યા છે માલિકો

નિયતિ પરીખ, અમદાવાદઃ કોવિડ-19ના વધતા જતા કેસોને કારણે લાગુ કરવામાં આવેલા રાત્રિ કર્ફ્યૂથી ઓર્ડર અને આવક ઘટતાં રેસ્ટોરાં બિઝનેસને વધુ એક આંચકો લાગ્યો છે. બુધવારથી રાત્રિ કર્ફ્યૂનો સમય રાતે 8 વાગ્યાનો કરી દેવાતાં મોટાભાગની રેસ્ટોરાંએ સાંજના સમય માટે ડાઈન-ઈન સુવિધા બંધ કરવાનો અને માત્ર મર્યાદિત ટેકઅવે ઓર્ડર લેવાનો નિર્ણય લીધો છે. રેસ્ટોરાંને 85 ટકા આવક સાંજના કલાક દરમિયાન ડાઈન-ઈન અને ઓર્ડરના કારણે થાય છે.

અમદાવાદમાં રેસ્ટોરાં ચલાવતા રુષભ પુરોહિતે કહ્યું હતું કે, ‘દોઢ કલાક અથવા 45 મિનિટ માટે રેસ્ટોરાં ચલાવવાનો કોઈ અર્થ નથી. અમારા સ્ટાફને પણ બધુ સમેટીને ઘરે જવામાં સમય લાગે છે. તેથી અમે સાંજે 4 વાગ્યાથી ટેકઅવે બૂકિંગ કરવાનું શરુ કરી દીધું છે અને જ્યાં સુધી 8 વાગ્યાનો કર્ફ્યૂ બંધ નહીં થાય ત્યાં સુધી ડાઈન-ઈનની સુવિધા બંધ રાખવામાં આવશે’.

મોટાભાગની રેસ્ટોરાંને આવક અને ઓર્ડરમાં ઘટાડો થતાં ધંધામાં નુકસાન ભોગવવાનો વારો આવ્યો છે. ‘અમે અત્યારે ડાઈન-ઈન સુવિધા બંધ કરી છે અને માત્ર ટેકઅવે શરુ કર્યું છે. આવક ઘટી છે તેથી ઓપરેટિંગ ખર્ચ પોષાય તેમ નથી’, તેમ શહેરની અન્ય એક રેસ્ટોરાંના માલિકે જણાવ્યું હતું.

છેલ્લા ત્રણ અઠવાડિયામાં ટેકઅવે ઓર્ડરમાં પણ 50 ટકાનો ઘટાડો થયો છે. શહેરમાં કોવિડ-19ના કેસ જે રીતે વધી રહ્યા છે તે જોતા તેમાં વધારે ઘટાડો જોવા મળે તેવી શક્યતા છે.

એકસમયે ધમધમાટ ચાલતી રેસ્ટોરાંઓમાં મોડી રાતની ડિલિવરીમાં ઘટાડો થતાં આવક પણ ઘટી છે. જેના લીધે ખાસ કરીને છેલ્લા 15 દિવસમાં ધંધો સ્થિર થયો છે.

ઓપરેટિંગ ખર્ચ એટલો જ રહેતો હોવાથી રેસ્ટોરાંના માલિકને ધંધો ટકાવવાની ચિંતા થઈ રહી છે. અમદાવાદમાં પિઝેરિયાના ભાગીદાર રેજિના ડાગાએ જણાવ્યું હતું કે, ‘અમારો ધંધો સાંજે મોટાભાગે સાંજે જ ડાઈન-ઈન અને ટેકઅવે દ્વારા સારો ચાલે છે. અત્યારની સ્થિતિ સારી નથી અને તેથી ગ્રાહકો ઘટ્યા છે. 8 વાગ્યાના કર્ફ્યૂથી અમારી સ્થિતિ વધારે ખરાબ થઈ ગઈ છે, કારણ કે ઓપરેટિંગ ખર્ચને પહોંચી વળવા માટે અમે સંઘર્ષ કરી રહ્યા છીએ’.

Share This :