April 11, 2021

Live Breaking News Coverage & Updates Website IN Gujarati Language

Live Breaking News Coverage & Updates Website IN Gujarati Language

વડોદરા: એમ્બુલન્સ ન આવતા કોરોના દર્દીના મૃતદેહને હાથલારી પર લઈ જવો પડ્યો

Share This :

હાઈલાઈટ્સ:

  • વડોદરામાં કોરોનાથી મૃત્યુ પામેલી મહિલાના મૃતદેહને હાથલારી પર લઈ જવો પડ્યો.
  • એમ્બુલન્સ સમયસર ન આવતા મહિલાના મૃતહેદને આ રીતે લઈ જવો પડ્યો.
  • વડોદરામાં છેલ્લા 24 કલાકમાં કોરોનાના નવા 351 કેસ નોંધાયા છે, જ્યારે 1નું મોત થયું છે.

અમદાવાદ: રાજ્યમાં કોરોના કેસો કાબુ બહાર જઈ રહ્યા છે. સ્થિત એવી છે કે, હોસ્પિટલોમાં બેડ ખૂટી પડ્યાં છે અને એમ્બુલન્સો પણ સતત દોડાવવી પડી રહી છે. જેના કારણે ઘણી વખત એવી કરુણાંતિકા સર્જાતી હોય છે કે જે જોઈને આંખમાં આંસુ આવી જાય. વડોદરામાં પણ આવી જ એક ઘટના બની છે. અહીં કોરોનાથી મૃત્યુ પામેલી એક મહિલાના મૃતદેહને સ્મશાન સુધી પહોંચાડવા માટે એમ્બુલન્સની વ્યવસ્થા ન થઈ શકતા તેમના પરિવારજનોએ મૃતદેહને હાથલારીમાં મૂકીને લઈ જવો પડ્યો હતો.

વડોદરાની આ ઘટનાનો વિડીયો પણ સોશ્યિલ મીડિયા પર ફરતો થયો છે. જેમાં દેખાઈ રહ્યું છે કે, એક મૃતદેહને હાથલારી પર મૂકીને લઈ જવામાં આવી રહ્યો છો. જાણવા મળ્યા મુજબ, કોરોનાના કારણે એક મહિલાનું મોત થયું હતું. આ મહિલાના મૃતદેહને સ્માશાન સુધી લઈ જવા માટે એમ્બુલન્સ બોલાવાઈ હતી. પરંતુ, એમ્બુલન્સ સમયસર પહોંચી ન હતી. બીજી તરફ રાત્રિ કર્ફયૂ લાગી શરૂ થવાનો હોવાથી બીજું વાહન પણ મળવું મુશ્કેલ હતું. આમ, બીજો કોઈ રસ્તો ન દેખાતા પરિવારજનોએ મહિલાના મૃતદેહને હાથલારી પર મૂકીને સ્મશાને લઈ જવાનું નક્કી કર્યું હતું.

Vadodara

કોરોના કાળમાં હજુ કેવી-કેવી ઘટનાઓ જોવી પડશે તે કલ્પીને જ ડર લાગવા લાગે છે. કોઈના સગાઓ મૃતદેહ લેવા આવતા નથી, તો કોઈને પોતાના સગાનું છેલ્લા સમયે મોં પણ જોવા મળતું નથી. આવા તો ઘણા કિસ્સાઓ કોરોના આવ્યો તે પછીથી બન્યા છે. વડોદરાની આ ઘટના એ વાત પણ ઉજાગર કરી રહી છે કે, ભલે રાજ્ય સરકાર સબ સલામત હોવાનો દાવો કરતી હોય, પરંતુ રાજ્યમાં કોરોનાની સ્થિતિ ખરેખર ગંભીર બની ચૂકી છે. જો એવું ન હોય તો એમ્બુલન્સ સમયસર આવી ગઈ હોત અને કોઈને પોતાના સ્નેહીજનના મૃતદેહને આ રીતે હાથલારી પર મૂકીને જવા મજબૂર થવું ન પડ્યું હોત. કેમકે, રાત્રિ કર્ફ્યૂ લાગી ગયા પછી રસ્તા પર ભીડ તો હોતી નથી ત્યારે ટ્રાફિકના કારણે એમ્બુલન્સ ન આવી શકે તેવું તો શક્ય નથી. કહેવાઈ રહ્યું છે કે, કોરોનાના દર્દીઓને જુદી-જુદી હોસ્પિટલોમાં લાવવામાં એમ્બુલન્સો એટલી બધી રોકાયેલી છે કે તેને બીજા દર્દીઓ સુધી પહોંચવાનો સમય જ નથી મળતો.

વડોદરા જેવા જ કિસ્સા લોકડાઉન સમયે પણ જોવા મળ્યા હતા. પરંતુ એ સમયે તો સ્થિતિ ગંભીર છે તેવું સ્વીકારી લેવાયું હતું, પરંતુ અત્યારે તો કોરોનાની સ્થિતિની ગંભીર હોવાનું રાજ્ય સરકારે હજુ સ્વીકાર્યું નથી અને આવા દ્રશ્યો જોવા મળી રહ્યા છે.

જણાવી દઈએ કે રાજ્યમાં છેલ્લા 24 કલાકમાં કોરોના વાયરસના નવા 3575 કેસો નોંધાયા છે અને 2217 દર્દીઓ સાજા થયા છે. છેલ્લા 24 કલાકમાં અમદાવાદમાં 804, સુરતમાં 621, રાજકોટમાં 395, વડોદરામાં 351 નવા કેસ નોંધાયા છે. રાજ્યમાં છેલ્લા 24 કલાકમાં કોરોના વાયરસના કારણે વધુ 22 દર્દીના મોત થતાં કુલ મૃત્યુઆંક 4620 પર પહોંચ્યો છે. જેમાં સુરત કોર્પોરેશનમાં 8, અમદાવાદ કોર્પોરેશનમાં 6, સુરતમાં 2, બનાસકાંઠામાં 1, ભાવનગર કોર્પોરેશનમાં 1, મહીસાગરમાં 1, મહેસાણામાં 1, પંચમહાલમાં 1 અને વડોદરા કોર્પોરેશનમાં વધુ 1 દર્દીનું મોત થયું છે.

Share This :