April 11, 2021

Live Breaking News Coverage & Updates Website IN Gujarati Language

Live Breaking News Coverage & Updates Website IN Gujarati Language

વૈજ્ઞાનિકોની ચેતવણી..તો ભારતમાં કોરોનાની સારવાર મુશ્કેલ અને રસી બેઅસર થશે

Share This :

હાઈલાઈટ્સ:

  • ભારત સંક્રમિત નમૂનાઓનું જેનેટિક સિક્વન્સિંગ કરવામાં પાછળ
  • વધતા જતાં કેસ પાછળનું કારણ સમજવા માટે જરુરી માહિતીનો અભાવ
  • બીજી લહેર વધુ ઘાતક સાબિત થાય એવી ચેતવણી

નવી દિલ્હીઃ ભારતમાં કોરોના સંક્રમણની બીજી લહેર ઘાતક સાબિત થઇ રહી છે. જેની પાછળ આંતરરાષ્ટ્રીય નિષ્ણાંતોએ દેશમાં કોરોનાના પોઝિટિવ સેમ્પલ્સ પર યોગ્ય રિસર્ચના અભાવને કારણભૂત ગણાવ્યું છે. નિષ્ણાંતોના મત મુજબ ભારત કોરોના સંક્રમણના પોઝિટિવ નમૂનાઓની ચોક્કસપણે તપાસ કરવામાં અસફળ રહ્યું, જેના લીધે તેની પાસે જરુરી માહિતીનો અભાવ છે જે ઝડપથી વધી રહેલા કેસના કારણને સમજવામાં મદદ કરી શકે.

બ્લૂમબર્ગની એક તાજેતરની રિપોર્ટમાં ચેતવણી આપવામાં આવી છે કે, જો ભારત જેનેટિક સિક્વેન્સિંગનું પ્રમાણ સમય રહેતા વધારશે નહીં તો દેશમાં કોરોનાની સારવાર મુશ્કેલ અને વેક્સીન બેઅસર સાબિત થાય એવી પરિસ્થિતિ ઉભી થઇ શકે છે.

નિષ્ણાંતો મુજબ, ભારત દેશ પોઝિટિવ સેમ્પલ્સની જેનેટિક સિકવન્સિંગ મુદ્દે બ્રિટન અને અમેરિકા જેવા દેશોની સરખામણીએ પાછળ રહી ગયો છે. સરકારી આંકડા પણ દર્શાવે છે કે ભારતે સંક્રમિત નમૂનાઓનું 1 ટકાથી પણ ઓછુ જેનેટિક સિક્વન્સિંગ કર્યું છે. બ્રિટનમાં આ આંકડો 8 ટકા છે. જ્યારે અમેરિકાના જણાવ્યા મુજબ તે ગત મહિનેથી નવા કેસમાંથી આશરે 4 ટકા સંક્રમિત નમૂનાઓની જેનેટિક સિક્વેન્સિંગ કરી રહ્યું છે.

બ્રિટનમાં કોરોના વાઈરસના નવા વેરિયેન્ટ મળ્યા પછી ડિસેમ્બર 2020માં ભારતમાં પણ ત્યાંથી આવનાર કેટલાક પ્રવાસીઓ તેનાથી સંક્રમિત હોવાના ખુલાસા પછી દિલ્હીમાં નમૂનાઓની તપાસ માટે 10 સરકારી લેબ ઊભી કરવામાં આવી હતી. જોકે જાન્યુઆરીથી માર્ચ સુધી ભારતે ફક્ત 11,064 સંક્રમિત નમૂનાઓનું સિકવન્સિંગ કર્યું. 30 માર્ચે આરોગ્ય મંત્રાલય દ્વારા આ આંકડા બહાર પાડવામાં આવ્યાં હતા. તે સમયે ભારતમાં નવા કેસના 0.6 ટકાથી પણ ઓછા સેમ્પલોનું સિકવન્સિંગ થયું હતું.

જોકે આરોગ્ય વિભાગનું કહેવુ છે કે, દેશમાં સંક્રમણના નવા કેસમાં વધારા સાથે નવા વેરિયન્ટનો કોઇ સંબંધ નથી. અત્યાર સુધી જે રિસર્ચ થયો એ મુજબ આ નવા પ્રકારના વાયરસમાં કેટલાક ઝડપથી ફેલાય એવા વાયરસનો પ્રકાર છે અને એક ઘાતક સાબિત થાય એવા વાયરસનો પ્રકાર છે. કેન્દ્રિય આરોગ્ય વિભાગ મુજબ, ભારતમાં 30 માર્ચ સુધી કોરોનાના યૂકે વેરિયન્ટના 807 અને દક્ષિણ આફ્રિકા સ્ટ્રેનના 47 કેસ હતા.

કેરળના અર્થશાસ્ત્રી અને પબ્લિક હેલ્થ પોલિસી એનાલિસ્ટ રિઝો.એમ.જોનના જણાવ્યા અનુસાર, રસીકરણની ધીમી કામગીરી, લોકોની બેદરકારી, સોશિયલ ડિસ્ટન્સિંગ અને માસ્કના નિયમોનું પાલન ન કરવાના લીધે કોરોનાના નવા કેસમાં વધારો થયો છે. ઝડપથી વધી રહ્યાં છે. તેમણે વર્તમાન સ્થિતિને લઇને ચેતવણી આપી હતી કે, અત્યાર સુધી બીજી લહેર ઓછી ઘાતક છે જેમાં મૃત્યુનું પ્રમાણ ઓછુ છે, પરંતુ આ લહેર ઘાતક સાબિત થશે.

ઉલ્લેખનીય છે કે, ભારતમાં કોરોના સંક્રમણની બીજી લહેર જે રીતે કહેર વર્તાવી રહી છે, તેને જોતાં વિશ્વના અન્ય દેશો અને આરોગ્ય સંસ્થાઓ પણ ચિંતા વ્યક્ત કરી ચૂકી છે. અહીં સુધી કે ભારતની વર્તમાન સ્થિતિને આખી દુનિયા માટે ખતરારુપ ગણાવી રહ્યા છે.

Share This :