March 4, 2021

Live Breaking News Coverage & Updates Website IN Gujarati Language

Live Breaking News Coverage & Updates Website IN Gujarati Language

સુરત: IT વિભાગ દ્વારા જપ્ત કરાયેલા જોબવર્ક માટેના ડાયમંડ મુક્ત કરવા માંગ

Share This :

સુરતઃ આવકવેરા વિભાગ દ્વારા અવાર નવાર કોઈને કોઈ ડાયમંડ કંપનીઓમાં તપાસ કરે છે. તપાસ માટે તમામ મશીનરી અને હીરા જપ્ત કરે છે. આ સ્થિતિમાં મહિનાઓ સુધી ચાલતી કાર્યવાહીને કારણે અનેક નાના કારખાનેદારનો માલ પણ ફસાઈ જાય છે અને તેમને કારખાનું ચલાવવામાં ભારે તકલીફ થાય છે. આ પ્રકારની કાર્યવાહીને કારણે અનેક કામદારોની રોજીરોટીને પણ અસર થતી હોવાથી સુરત ચેમ્બર ઓફ કોમર્સ દ્વારા આવકવેરા વિભાગને રજૂઆત કરી છે કે લીગલ ડોક્યુમેન્ટ સાથે જોબવર્ક માટે જે માલ જપ્ત કરવામાં આવ્યો છે તે મુક્ત કરવામાં આવે.

ધી સધર્ન ગુજરાત ચેમ્બર ઓફ કોમર્સ એન્ડ ઇન્ડસ્ટ્રી દ્વારા જણાવવામાં આવે છે કે, સુરત આવકવેરા વિભાગ દ્વારા વરાછા રોડ સ્થિત હીરાબાગની ડાયમંડ કંપની દિયોરા એન્ડ ભંડેરી કોર્પોરેશન ઉપર કરેલી દરોડા કાર્યવાહી બાદ દસ હજારથી વધુ નંગ હીરા અને 1200થી વધુ મશીનો જપ્ત કરવામાં આવ્યા છે. આ અંગે સુરત આવકવેરા વિભાગ દ્વારા જે કોઇપણ કાયદેસરની કાર્યવાહી થતી હોય તેમજ જે કાર્યવાહી થવા યોગ્ય હોય તેની સામે ચેમ્બરને કોઇ વાંધો નથી, પરંતુ તેમની સાથે જોડાયેલા નાના નાના કારખાનેદારોનો માલ જે આવકવેરા વિભાગ દ્વારા જપ્ત કરવામાં આવ્યો છે તેને તાત્કાલિક ધોરણે મુકત કરવામાં આવે તેવી ચેમ્બરની લાગણી છે.

ચેમ્બરના પ્રમુખ દિનેશ નાવડીયાએ જણાવ્યું હતું કે, ડાયમંડ કંપની દિયોરા એન્ડ ભંડેરી કોર્પોરેશન દ્વારા લીગલ ડોકયુમેન્ટ સાથે જોબવર્ક માટે જે માલ આપ્યો છે તેને મુકત કરવામાં આવે. કારણ કે તેની સાથે એસ.એમ.ઇ. સેકટરના નાના નાના કારખાનેદારો જોડાયેલા હોવાથી તેઓને આર્થિક રીતે ખૂબ મોટી નુકસાની વેઠવાનો વારો આવી શકે તેમ છે. આની સાથે બેથી અઢી લાખ વર્કરો પણ જોડાયેલા હોવાથી તેઓ પણ બેકાર થવાનો તેમજ હીરા ઉદ્યોગની અંદર અંધાધુંધી ફેલાવવાનો ભય છે. આ બાબતનો સુરત આવકવેરા વિભાગે વિચાર કરવો જોઇએ.

તેમણે વધુમાં જણાવ્યું હતું કે, કોવિડ– 19માં અન્ય ઉદ્યોગોની સાથે પડી ભાંગેલો હીરા ઉદ્યોગ હાલમાં ધીરે ધીરે પાટા ઉપર આવી રહયો છે અને હીરાનું એક્ષ્પોર્ટ પણ વધી રહયું છે. ભારતમાં સૌથી વધુ હુંડીયામણ હીરા ઉદ્યોગ થકી સરકારને મળી રહે છે ત્યારે આવકવેરા વિભાગ દ્વારા આ દિશામાં પણ વિચારવું જોઇએ. આ અંગે સુરત આવકવેરા વિભાગને કોઇ શંકાકુશંકા હોય તો ચેમ્બર તથા હીરા ઉદ્યોગના આગેવાનો વિભાગના અધિકારીઓ સાથે મિટીંગ કરી શકે તેમ છે.

Share This :